MANILA, Philippines — Walang patid ang ginagawang paghahanda ng mga miyembro ng Team Philippines para sa darating na 2024 Olympic Games sa Paris, France.
Dumating kamakalawa sa Metz, France sina fencer Sam Catantan at gymnasts Aleah Finnegan at Emma Malabuyo para sumalang sa Les Arènes Training Camp.
Kaagad sumabak ang tatlo sa pukpukang ensayo para paghandaan ang 2024 Paris Olympics na nakatakda sa Hulyo 26 hanggang Agosto 11.
Samantala, sumagwan si Pinay rower Joanie Delgaco ng bagong personal record na 7:23 sa 2000m time trial kumpara sa nakaraan niyang oras na 7:39.
Nasa maigting na ring preparasyon sina Tokyo Olympics silver medalists Nesthy Petecio at Carlo Paalam at bronze medalist Eumir Marcial kasama sina Hergie Bacyadan at Aira Villegas.
Sa katunayan ay nakipag-sparring na si Paalam kay European Champion Vasile Usturoi ng Belgium at sina Villegas at Bacyadan kina American Jennifer Lozano at Patricia Mbata ng Nigeria, ayon sa pagkakasunod.
“To our athletes and coaches in Paris, mag-focus lang kayo sa training. Let go of your worries, the PSC and POC will take care of those for you,” ani Philippine Sports Commission (PSC) chairman Richard Bachmann sa 22 Olympic-bound athletes.
Si weightlifter Hidilyn Diaz ang bumuhat sa kauna-unahang Olympic gold ng bansa sa Tokyo Games.