Cruz tatrangko sa Solar Spikers
MANILA, Philippines — Pangangatawanan ni Leila Cruz ang pagpili sa kanya ng Capital1 Solar Energy bilang No. 2 overall pick ng kauna-unahang Premier Volleyball League (PVL) Rookie Draft.
Ang pagpili sa six-foot-1 na si Cruz ang magpapalakas sa Solar Spikers na nagtala ng 1-10 record sa nakaraang 2024 PVL All-Filipino Conference na pinagreynahan ng Creamline Cool Smashers.
“I’ll try my best talaga to bring justice doon sa top two pick na binigay nila to me and I will do everything na makakaya ko para mabigyan ng mas better finish this season ang Capital1,” sabi ng opposite spiker.
Matapos tulungan ang La Salle Lady Spikers sa pagkopo sa UAAP Season 85 championship ay nagkaroon si Cruz ng ACL injury at hindi nakalaro sa Season 86.
Mula kay coach Ramil de Jesus sa La Salle ay maglalaro si Cruz para kay veteran mentor Roger Gorayeb sa Capital1.
“Super nakakatuwa na ma-handle nilang dalawa kasi we all know naman na parehas sila talagang veteran sa larangan ng volleyball,” ani Cruz kina De Jesus at Gorayeb.
Bukod kay Cruz, kinuha rin ng Solar Spikers sa PVL Draft sina No. 14 pick Roma Mae Doromal at No. 20 selection Gilliana Torres.
Ipaparada ng Capital1 sa 2024 PVL Reinforced Conference, magbubukas sa Hulyo 16, si Russian import Marina Tushova.
Bukod kay Tushova, ang iba pang imports ay sina Erica Staunton (Creamline), Zoi Faki (Choco Mucho), Khat Bell (Chery Tiggo), Elena Samoilenko (PLDT), MJ Perez (Cignal), Oly Okaro (Akari), Yeny Murillo (Farm Fresh), Monique Helena (Galeries Tower) at Wilma Salas (Petro Gazz).
- Latest
