Zus Coffee happy sa mga nakuha sa PVL Draft

MANILA, Philippines — Bukod kay No. 1 overall pick Thea Gagate, tatlong players pa ang nakuha ng Zus Coffee sa nakaraang 2024 Premier Volleyball League (PVL) Rookie Draft noong Lunes.

Sinabi ni coach Jerry Yee na sina Gagate ng De La Salle University, Shar Ancheta at Nikka Yandoc ng Adamson University at Jenina Zeta ng University of the East ang kailangan ng Thunderbelles.

“So we are very happy naman na sila iyong nakuha natin and then iyong mga available na nandiyan and iyong mga talagang mga kailangan namin na players, kailangan namin na posisyunan, napunan namin,” wika ni Yee.

Ang Strong Group Athletics, ngayon ay Zus Coffee, ay walang naipanalo sa kabuuang 11 laro sa nakaraang 2024 PVL All-Filipino Conference na pinagreynahan ng Creamline kontra sa Choco Mucho.

Kumpiyansa si Yee na malaki ang maitutulong nina Gagate, Ancheta, Yandoc at Zeta sa Thunderbelles sa darating na PVL Reinforced Conference.

“Lalaban, lalaban of course. Iyong winning, iba pa naman iyon pero it’s a process sabi nga nila,” ani Yee.

Makakasama ng apat na rookies sa Zus Coffee sina St. Benilde Lady Blazers stars Cloanne Mondoñedo, Gayle Pascual, Jade Gentapa at Michelle Gamit.

Si Japanese Asaka Tamaru ang magiging import ng Thunderbelles sa Reinforced Conference na magbubukas sa Hulyo 16 sa Philsports Arena sa Pasig City.

Ang iba pang imports ay sina Erica Staunton (Creamline), Zoi Faki (Choco Mucho), Khat Bell (Chery Tiggo), Elena S moilenko (PLDT), Marina Tushova (Capital1), MJ Perez (Cignal), Oly Okaro (Akari), Yeny Murillo (Farm Fresh) at Monique Helena (Gale­ries Tower).