MANILA, Philippines — Naitakas ng Smile 360 Bullies ang 21-19 panalo kontra sa Bren Sports para pagharian ang Season 2 ng World Balance 3x3 Streetball League kamakalawa sa Trinoma Activity Center sa Quezon City.
Ibinuslo ni Geoffrey Santos ang game-winning deuce sa huling segundo upang gabayan sa kampeonato ang koponan bilang No. 1 seed sa bigating 8-team tournament tampok ang pinakamagagaling na amateur players sa bansa.
Tinanghal na Most Valuable Player si Santos para sa P5,000 worth ng World Balance gift certificates habang wagi ng P250,000 na cash prize ang buong Smile 360 Bullies.
Swak din sa Mythical Team ang kanyang kakamping si Don Marlon Querido, John Dave Villas at Ryan Ricasio ng Bren Sports pati na si Angelo Barabab ng Sports Flooring Global Kings.
Samantala, hindi naman umuwing luhaan ang Bren Sports na nanalo pa rin ng P150,000 at P15k worth ng World Balance gift certificates bilang runner-up.
“World Balance is happy to see how good this Season 2 is and you can see it with the level of play that the teams showed from the prelims to the finals. This only excites World Balance to continue its endeavor to support Filipinos through sports,” ani Mary Lyn Go, World Balance marketing and creatives director.