MANILA, Philippines — Naghayag ng paglahok ang Boss Lady sa magaganap na 2024 PHILRACOM “Hopeful Stakes Race” na ilalarga sa darating na Linggo sa Metro Turf, Malvar sa Tanauan City, Batangas.
Rerendahan ni star jockey Jeffril Tagulao Zarate, mapapalaban panigurado ang Boss Lady sa 10 mahuhusay na batang kabayo na nagsaad ng pagsali sa distansyang 1,800 meter race.
Posibleng magbigay ng magandang laban sa Boss Lady ay ang Feet Bell at Amor My Love na galing sa impresibong panalo noong Linggo.
May nakalaan na P1M. guranteed prize na ikakalat sa unang anim na kabayong tatawid sa meta, ang ibang sasalang sa pista ay ang Beltuna, Boss Uno, Follow Da Ruler, Gameir Winner, Malibu Princess, Spolarium, Still Somehow at Wolfthreefivenine.
Susungkitin ng mananalong kabayo ang P600,000, mapupunta sa second placer ang P200,000 habang P100,000, P50,000, P30,000 at P20,000 ang third hanggang sixth place, ayon sa pagkakasunod.
Samantala, pakakawalan din sa nasabing petsa ang 2nd leg Triple Crown Stakes Race at 3-Year-Old Locally Bred Stakes Race kaya tiyak na masaya ang paglilibang ng mga karerista.
Siyam ang nagsabi ng pagsali sa Triple Crown habang may 10 ang sasalang sa 3-Year-Old Locally Bred Stakes Race.
Pakay ng Ghost na masungkit ang panalo sa second leg upang magkaroon ng tsansa sa asam na Triple Crown sweep at maukit ang pangalan sa history ng karera.