MANILA, Philippines — Sinikwat ni Don Trollano ang PBA Press Corps-Pilipinas Player of the Week award habang abangers muna ang San Miguel Beer sa finals ng 2024 PBA Philippine Cup.
Kumamada ng 20.0 puntos sa 62-percent field goal sahog pa ang 9.5 rebounds at 2.0 assists si Trollano sa dalawang laban ng Beermen noong nakaraang linggo upang makakumpleto sila ng sweep sa best-of-seven semifinals kontra sa Rain or Shine.
Tumipa ng 20 puntos, 11 rebounds at 4 assists si Trollano sa Game 3 upang punan si 7-time PBA MVP June Mar Fajardo na nagkasya lang sa 11 puntos at 11 rebounds.
Wagi ang SMB sa naturang laro, 117-107, upang makapagtayo ng higanteng 3-0 abante.
Parehong output ang pinakawalan ni Trollano sa sumunod na laro tampok ang 13 puntos sa 32-13 bomba ng Beermen upang makumpleto ang 107-100 comeback win sa Game 4.
Pahinga muna ang SMB ngayon habang hinihintay ang mananalo sa isa pang bracket tampok ang Ginebra at Meralco.
Abante ang Gin Kings sa serye, 3-2, at umaasam na maitakda na ang title showdown sa sibling rival na Beermen sa krusyal na Game 6 as of press time.