MANILA, Philippines — Muling nagdagdag-puwersa ang Cignal HD Spikers nang kunin nito ang dalawang UAAP standouts para sa mga susunod na torneong lalahukan nito.
Pasok sa HD Spikers sina opposite hitter JM Ronquillo at middle blocker Martin Bugaoan na malaki ang maitutulong sa kanilang tropa.
Sina Ronquillo at Bugaoan ang ikalawa at ikatlong dagdag sa lineup ng Cignal matapos unang hugutin si UAAP Seaosn 86 Finals MVP Joshua Retamar ng National University.
Naglaro si Ronquillo para sa De La Salle University na nakaabot sa Final Four sa dalawang nakalipas na seasons.
Sa kabilang banda, si Bugaoan, ang nakababatang kapatid ni Cignal HD Spiker JP, ay naglaro para sa Far Eastern University.
Itinanghal itong 1st Best Middle Blocker sa UAAP Season 86.
“Hopefully, these three will be here for the long haul and help us reach our goals each conference and season,” ani Cignal HD Spikers head coach Dexter Clamor.
Sariwa pa ang Cignal sa matamis na kampeonato sa Spikers’ Turf Open Conference.
Target ng HD Spikers na madugtungan ito sa Invitational Conference na hahataw sa Oktubre.
“Men’s volleyball has been gaining steam again as the pandemic died down, so we see it fit that Cignal sustains its dominance and excellence in the sport since 2013. The level of talent has been rising, and we want to get the best ones out there to bolster our squad and win more championships,” dagdag ni Clamor.