MANILA, Philippines — Tatangkain ng Talk ‘N Text, NorthPort at Terrafirma na manatili sa Magic 8 habang susubok makahabol ang Phoenix sa krusyal na double-header ng 2024 PBA Philippine Cup ngayon sa Ninoy Aquino Stadium.
Unang magsasabong ang Batang Pier at Dyip sa alas-4:30 ng hapon bago ang salpukan ng Tropang Giga at Fuel Masters sa alas-7:30 ng gabi.
Tabla sa No. 8 ang NorthPort at Terrafirma sa ngayon hawak ang 4-5 kartada habang nasa unahan lang nang bahagya ang TNT bitbit ang 4-4 marka.
Nasa likod nila ang Phoenix, 3-5, na katabla ang Meralco at Blackwater para sa No. 9.
Top 8 lang ang papasok sa quarterfinals kaya siguradong rambulan ang apat na koponan upang makasukbit ng importanteng tagumpay.
Pinakagigil dito ang Batang Pier na sumadsad sa four-game losing skid matapos maging isa sa mga lider ng torneo sa unang bahagi hawak ang 4-1 kartada.
Tampok sa biglang umalat na kampanya ng NorthPort ang 100-120 kabiguan kontra sa wala pang galos at quarterfinals-bound na San Miguel Beer.
Galing din sa talo ang Terrafirma, 116-104, kontra sa NorhtPort sa Candon, Ilocos Sur noong nakaraang linggo.
Maging ang Tropang Giga ay kakalasap lang ng dikit na 87-83 pagkatalo laban sa Barangay Ginebra habang wagi naman ang Phoenix kontra sa NLEX, 112-77, upang manatiling nasa kontensyon.