MANILA, Philippines — Pareho ang nasa isip ng Adamson University Lady Falcons at University of the Philippines Lady Maroons, ang masungkit ang unang panalo sa UAAP Season 86 women’s volleyball tournament.
Pero isa lang sa kanila ang matutupad ang asam dahil sila ang magkatapat ngayong alas-2 ng hapon na lalaruin sa Mall of Asia Arena sa pasay City.
Sumadsad ang Lady Falcons at Lady Maroons sa nakaraang laban nila at pakay nilang bumangon para hindi mabaon sa ilalim ng team standings.
Tangan ng Lady Falcons at Lady Maroons ang 0-1 karta.
Sina Lucille Almonte at Ishie Lalongisip ang namuno sa opensa para sa Adamson nang mawalis sila ng nagdedepensang De La Salle University sa opening day matapos magtala ng tig-6 points.
Sina Almonte at Lalongisip pa rin ang kakapitan ng Lady Falcons.
Ibabangga ng Lady Maroons sina Nina Ytang, Jewel Encarnacion at Nikha Cabasac.
Samantala, maghaharap naman sa alas-4 ng hapon ang National University Lady Bulldogs at Ateneo Lady Eagles.