SGA bumandera sa panalo ng Thunder

OKLAHOMA CITY — Bumanat si Shai Gilgeous-Alexander ng 38 points habang may 32 markers si Jalen Williams para pamunuan ang Thunder sa 127-113 paggupo sa Sacramento Kings.

Ito ang unang panalo ng Oklahoma City (36-17) sa kanilang ikatlong paghaharap ng Sacramento (30-22) ngayong season.

Nagdagdag si Lu Dort ng 17 points kasunod ang 14 markers ni 7-foot-2 Chet Holmgren para sa Thunder na umiskor ng 30 points mula sa 18 turnovers ng Kings.

Tumipa sina Gilgeous-Alexander at Williams ng tig-19 points para sa 67-57 halftime lead ng Oklahoma City bago ibaon ang Sacramento sa 121-108 sa huling apat na minuto ng fourth quarter.

Humakot si Domantas Sabonis ng 21 points, 14 assists at 11 rebounds para sa kanyang ikalawang sunod na triple-double at pang-17 sa season para sa Kings.

Humataw si Malik Monk ng 26 points habang nalimitahan si De’Aaron Fox, may average na 27 points per game, sa 15 points.

Sa Miami, kumolek­ta si Jayson Tatum ng 26 points, 10 rebounds at 9 assists para gabayan ang Boston Celtics (41-12) sa 110-106 panalo sa Heat (28-25)

Nag-ambag si Kristaps Porzingis ng 25 points para sa Boston, samantalang may 20 at 15 markers sina Jaylen Brown at Jrue Holiday, ayon sa pagkaka­sunod.

Binanderahan ni Tyler Herro ang Miami sa kanyang 24 points kasunod ang 22 markers ni Bam Adebayo.