Player of the Week si Fajardo

MANILA, Philippines — Tinanghal si June Mar Fajardo ng San Miguel Beer bilang PBA Press Corps-Pilipinas Live Player of the Week matapos gabayan ang koponan papasok sa PBA Commissioner’s Cup Finals.

Humakot si Fajardo ng double-double na 15.3 points at 11.0 rebounds sahog pa ang 3.7 blocks sa tatlong laro upang matulungan ang Beermen na walisin ang reigning champion na Barangay Ginebra, 3-0, sa kanilang best-of-five semifinals series.

Tampok sa solidong performance ni Fajardo ang 11 points at 10 rebounds sa clinching Game 3 win ng Beermen, 94-91, sa harap ng 15,126 fans sa Mall of Asia Arena noong Linggo.

Tumikada rin ang seven-time PBA MVP ng impresibong 61.5 percent field goal kontra sa karibal na si Christian Standhardinger na siyang nangunguna sa Best Player of the Conference race.

Ito ang unang Player of the Week citation ni Fajardo matapos madiskaril ng left hand injury sa kalagitnaan ng torneo.

Dinaig ni Fajardo ang kakamping si CJ Perez para sa lingguhang parangal na iginagawad ng grupong sumusubaybay sa beat ng pinakatamandang professional league sa Asya.

Kumamada si Perez ng 18.0 points, 7.0 rebounds, 3.0 assists at 1.7 steals para sa solidong kontribusyon kay Fajardo at pambatong import na si Bennie Boatwright Jr.

Hayahay muna sina Fajardo, Perez at buong SMB ngayon habang hinihintay ang magwawagi sa isa pang semis series sa pagitan ng No. 1 seed na Magnolia at palabang fourth seed na Phoenix Super LPG.

Idinaraos pa ang Game 4 ng kanilang serye as of press time bagama’t  abante ang Magnolia hawak ang 2-1 kartada.