Edwards bumida sa USA

MANILA, Philippines — Kumolekta si Anthony Edwards ng 22 points, 8 boards at 4 assists sa loob ng 19 minuto para igiya ang paboritong Team USA sa 110-62 paglampaso sa Jordan at walisin ang Group C ng 2023 FIBA World Cup kahapon sa MOA Arena sa Pasay City.

Ang 3-0 record ng mga Americans ang nag-akay sa kanila sa second round at inihulog ang mga Jordanians na may 0-3 baraha.

Lalabanan ng USA si Nikola Vucevic at ang Montenegro (2-1), ang isa sa dalawang top teams sa Group D bukod sa Lithuania (3-0), sa second round.

Nag-ambag si Bobby Portis Jr. ng 13 markers at may 12 at 10 points sina Jaren Jackson Jr. at Jalen Brunson, ayon sa pagkakasunod, para sa Team USA.

Laglag ang mga Jordanians sa classification phase at lalabanan ang matatalo sa pagitan ng New Zealand (1-1) at Greece (1-1.

Sa Smart Araneta Coliseum, inangkin ng Serbia (3-0) ang 115-83 panalo laban sa South Sudan (1-2) sa Group B papasok sa second round.

Sa Okinawa Arena sa Japan, kinuha ng Georgia (2-1) ang 70-59 tagumpay kontra sa Venezuela (0-3) sa Group F patungo sa second round.