Donaire minalas kay Santiago

MANILA, Philippines — Isang unanimous decision loss ang nalasap ni dating world four-division king Nonito ‘The Filipino Flash’ Donaire Jr. sa kanyang pagsagupa kay Alexandro Santiago ng Mexico kahapon sa T-Mobile Arena sa Las Vegas, Nevada.

Bigo ang 40-anyos na si Donaire (42-8-0, 14 knockouts) na maging pinakamatandang world bantamweight champion habang nakamit ng 27-anyos na si Santiago (28-3-0, 14 KOs) ang bakanteng World Boxing Council (WBC) crown.

Kumolekta si Santiago, dating naka-draw si International Boxing Federation (IBF) super featherweight titlist Jerwin Ancajas, ng 115-113, 116-112, 116-112 points para talunin si Donaire.

Nanggaling ang tubong Talibon, Bohol na si Donaire sa isang second-round TKO loss kay Japanese Naoya Inoue noong Hunyo ng nakaraang taon.

Malinaw na nagamit ni Santiago ang kanyang 13 taon na agwat sa edad kay Donaire para makamit ang WBC bantamweight title.

Hangad sana ni Do­naire na maging isang unified champion sa bantamweight division kung saan niya hahamunin sina World Boxing Association (WBA) titlist Takuma Inoue at World Boxing Organization (WBO) king Jason Moloney.

Nakatama si Donaire ng isang matulis na left hook na nagpauga kay Santiago sa third round, ngunit hindi na nakaporma sa mga sumunod na yugto ng laban.