76ers winalis ang Nets sa 1st round
NEW YORK — Nagposte si forward Tobias Harris ng 25 points at 12 rebounds para banderahan ang Philadelphia 76ers sa 96-88 pagsibak sa Brooklyn Nets at kumpletuhin ang 4-0 sweep sa kanilang Eastern Conference first- round series.
Tumipa si James Harden ng 17 points, 11 assists at 8 rebounds para sa third-seeded 76ers na sasagupain ang mananalo sa No. 2 Boston Celtics at No. 7 Atlanta Hawks sa conference semifinals.
Hawak ng defending Eastern Conference champion na Celtics ang 2-1 lead sa Hawks.
Hindi naglaro para sa Philadelphia si NBA leading scorer at MVP finalist Joel Embiid dahil sa kanyang sprained right knee.
“He’s the leader of this team and for him, he takes the guys before the game and he told us good luck and we appreciate him for that. And we need him to get healthy,” ani guard Tyrese Maxey kay Embiid.
Tumapos si Maxey na may 16 points, habang nag-ambag si Paul Reed ng 10 points at 15 rebounds.
Pinamunuan ni Spencer Dinwiddie ang Nets sa kanyang 20 points at humakot si Nic Claxton ng 19 points at 12 rebounds.
Sa Los Angeles, kumolekta si Anthony Davis ng 31 points at 17 rebounds, habang may 25 markers si LeBron James para igiya ang Lakers sa 111-101 panalo sa Memphis Grizzlies at kunin ang 2-1 lead sa kanilang Western Conference first-round series.
Nag-ambag si Rui Hachimura ng 16 points para sa seventh-seeded na Los Angeles na dinuplikahan ang NBA record na 26-point lead sa second quarter.
Nagtala si Memphs star Ja Morant ng 45 points, 13 assists at 9 rebounds sa kanyang pagbabalik matapos ang one-game absence dahil sa namagang kanang kamay.
Sa Miami, kumamada si Jimmy Butler ng 30 points para sa 121-99 paggiba ng No. 8 Heat sa top-seeded na Milwaukee Bucks at kunin ang 2-1 lead sa serye.
Wala pa rin si two-time MVP Giannis Antetokounmpo para sa Bucks dahil sa kanyang bruised lower back.
Sa Los Angeles, humataw si Kevin Durant ng 31 points at may 30 markers si Booker sa 112-100 panalo ng Phoenix Suns sa Kawhi Leonard-less Clippers at agawin ang 3-1 kalamangan sa kanilang duwelo.
- Latest
