MANILA, Philippines — Pinadapa ng MPAMS-San Mateo ang AMA University QC, 89-82, para pagharian ang inaugural Ballout Hoops Luzon Challenge Open Tournament sa University of Makati Gym.
Humataw si Mar Villahermosa ng 27 points at kumolekta si John Tayongtong ng triple-double na 12 points, 15 assists at 10 rebounds para sa San Mateo.
Nagtala rin si Villahermosa, hindi naglaro sa MPBL kagaya ni Tayongtong, ng 4 steals at 5 assists.
“Worth it iyong hindi ako sumali muna sa MPBL kasi nga kaka-recover ko lang from an Achilles heel injury,” ani Villahermosa na star player ng Caloocan Supremos sa MPBL.
Hindi rin naglaro si Tayongtong sa MPBL.
Nagdagdag si Exequiel Biteng ng 12 points kasunod ang tig-11 markers nina Mac Sevilla at RJ Diwa para sa paggupo ng Saints sa AMA University.