MIAMI — Humataw si Jimmy Butler ng 27 sa kanyang 41 points sa second half para banderahan ang Heat sa 118-107 pagsunog sa Boston Celtics sa Game One ng kanilang Eastern Conference finals.
Nagtala rin si Butler ng 9 rebounds, 5 assists, 4 steals at 3 blocked shots para sa 1-0 lead ng Miami sa kanilang best-of-seven championship series.
“Jimmy Butler is an elite competitor,” ani Fil-Am coach Erik Spoelstra. “There’s a lot of guys in this league that are playing basketball. He’s competing to win. That’s a totally different thing and he does that as well as anybody in this league.”
Nagdagdag si Tyler Herro ng 18 points kasunod ang 17 markers ni Gabe Vincent para sa Heat na nakahugot pa kina Max Strus at Bam Adebayo ng 11 at 10 points, ayon sa pagkakasunod.
Umiskor si Jayson Tatum ng 29 sa panig ng Celtics na naglaro na wala sina starters Marcus Smart (foot) at Al Horford (health and safety protocols).
May 24 markers si Jaylen Brown at tig-18 points sina Robert Williams III at Payton Pritchard.
Umiskor ang Miami ng 39 points sa third quarter kumpara sa 14 ng Boston para kunin ang 76-64 abante matapos bumangon mula sa 13-point deficit sa first half.
Inilista ng Heat ang 20-point lead, 96-76, matapos isalpak ni Herro ang tatlong free throws sa kaagahan ng fourth period bago ito naputol ng Celtics sa siyam sa 7:33 minuto nito.
Muling bumida si Butler para selyuhan ang panalo ng Miami.