Ginebra puro na

MANILA, Philippines — Isang panalo na lang ang kailangan ng Barangay Ginebra para sa matagumpay na pagde­depensa sa kanilang korona sa PBA Governors’ Cup.

Inangkin ng Gin Kings ang 3-2 lead matapos patumbahin ang Me­­ralco Bolts, 115-110, sa Game Five ng PBA Governors’ Cup Finals kahapon sa Smart Araneta Coliseum.

Kumolekta si Best Import Justin Brownlee ng 40 points, 11 rebounds, 5 assists at 2 blocks para sa bentahe ng Ginebra sa best-of-seven championship series nila ng Meralco.

Humakot si Best Pla­yer of the Conference Scottie Thompson ng 19 markers, 11 assists at 9 rebounds para sa Gin Kings.

Kung muling mana­nalo ang Gin Kings sa Bolts sa Game Six sa Miyerkules ay makakamit nila ang ikaapat na titulo sa huling limang edisyon ng torneo.

Inilista ng Gin Kings ang 54-40 kalamangan sa huling 1:04 minuto ng second period matapos isara ang first quarter ta­ngan ang maliit na 25-22 bentahe sa Bolts.

Hindi sumuko ang Me­ralco at nakalapit sa 70-74 matapos maghulog ng 10-1 bomba sa 3:38 minuto ng third period ga­ling sa 60-73 pagkakaiwan.

Nagsanib-puwersa naman sina Brownlee, Thompson at Tolentino para sa 96-82 paglayo ng Ginebra sa 7:41 minuto ng final canto.

Isang solong 13-2 atake ang ginawa ni import Tony Bishop para idikit muli ang Bolts sa 95-98 kasunod ang layup ni Black para sa kanilang 97-98 agwat sa huling 4:44 minuto ng laro.

Ngunit kumamada si Standhardinger ng dalawang sunod na basket para itaas ang Gin Kings sa 102-97 habang ang triple ni Thompson ang nagpadyak sa kanilang 105-97 bentahe sa huling 2:18 minuto nito.