TNT swak na sa quarterfinals

MANILA, Philippines — Humakot si import Aaron Fuller ng 24 points, 12 rebounds, 3 steals at 3 blocks para akayin ang TNT Tropang Giga sa 127-107 panalo sa sibak nang Terrafirma papasok sa quarterfinals ng PBA Governors’ Cup kahapon sa Smart Araneta Coliseum.

Ito ang ikaapat na sunod na arangkada ng Tropang Giga para sa kanilang 6-4 record at inilatay ang pang-limang dikit na kamalasan ng Dyip sa bitbit na 2-9 marka.

“I hope we are not yet peaking because there are still a lot of things for us to work on our game,” sabi ni head coach Chot Reyes na target ang ‘twice-to-beat’ incentive sa quarterfinals laban sa NorthPort bukas.

Nag-ambag si rookie Mikey Williams ng 16 markers, 6 assists, 4 boards at 2 steals para sa Tropang Giga.

Binanderahan ni import Antonio Hester ang Terrafirma sa kanyang 30 points at 13 boards.

Dumikit ang Dyip sa first half, 53-61, bago kumawala ang Tropang Giga sa likod nina Williams at Castro sa third period para iposte ang 19-point lead, 90-71, sa huling 1:10 minuto.

Ang jumper ni Fuller ang muling nagbigay sa TNT ng 120-101 kalamangan sa huling 3:18 minuto ng fourth quarter na tuluyan nang nag-alis ng pag-asa sa Terrafirma.

Sa ikalawang laro, tinapos ng Blackwater ang kanilang PBA record na 29-game losing skid matapos takasan ang No. 1 Magnolia, 101-100, para sa una nilang panalo sa torneo.