Gagawin lahat ni Watanabe sa Tokyo Games
![Gagawin lahat ni Watanabe sa Tokyo Games](https://media.philstar.com/photos/2021/06/29/watanabe_2021-06-29_22-14-34.jpg)
MANILA, Philippines — Malabo man ang tsansang makamit ang pinapangarap na kauna-unahang gold medal sa Olympic Games ng Pilipinas ay lalaban pa rin nang husto si Fil-Japanese judoka Kiyomi Watanabe.
Ito ang tiniyak kahapon ni Philippine Judo Federation (PJF) president Dave Carter sa Philippine Sportswriters Association (PSA) Forum online edition.
“Lahat po posible,” wika ni Carter sa pagsabak ni Watanabe sa Olympics sa Tokyo, Japan. “Mahirap naman na kapag sinabi natin ngayon na hindi kaya ni Kiyomi tapos sorpresahin tayo sa huli.”
Nabigyan ang 24-anyos na si Watanabe ng Olympic slot via continental quota sa women’s -63 kilogram class base sa final at official qualification list na inilabas ng International Judo Federation (IJF).
Kasama ni Watanabe sa kanyang weight division sina World No.1 Clarisee Agbenenou ng France, 2016 Rio de Janeiro Olympics gold medalist Tina Trstenjak ng Slovenia at Olympics bronze medalist Sanne Vermeer ng Netherlands.
“Hindi po natin nililimitahan ang kakayahan ng ating manlalaro dahil malakas itong player nating ito pati iyong puso niya,” ani Carter kay Watanabe na isang four-time gold medalist ng Southeast Asian Games. “Talagang fighter ito.”
“Kinakailangan na manalo siya ng lima hanggang anim na matches para makarating siya sa dulo (gold medal round),” dagdag nito.
Si Kodo Nakano ang inilaban ng bansa noong 2016 Olympics sa Rio de Janeiro, Brazil kapalit ng umatras na si Alireza Khojasteh ng Iran sa men’s 66kg category.
Kumpiyansa pa rin si Carter na makakapag-uwi si Watanabe ng anumang medalya mula sa Tokyo Olympics kahit bigatin ang mga kalaban.
- Latest