Zamboanga-Family’s Brand Sardines grand champion ng Chooks-to-Go 3x3

MANILA, Philippines — Naitakas ng Zamboanga City Family’s Brand Sardines ang makapigil hiningang 22-19 panalo kontra Nueva Ecija Rice Vanguards sa championship round ng Chooks-to-Go Pilipinas 3x3 President’s Cup  Grand Finals leg kahapon sa INSPIRE Sports Academy bubble sa Calamba, Laguna.

Isinalpak ni Joshua Munzon ang panelyong two points upang tangha-ling kampeon ang Zamboanga City Family’s Brand Sardines at ibulsa ang P1-M premyo.

Abante ang Zamboanga ng isang puntos, 20-19 at muntik pa silang masilat pero mabuti na lang at sumablay ang tira ni Gab Banal sa two-point area.

Ang Family’s Brand Sardines ang naka-re-bound matapos ang mintis at hinawakan ni Munzon ang bola at walang kabang itinira ito, resulta: swak sa rim.

May tsansa sanang tapusin ni Alvin Pasaol ng mas maaga ang laban nang lamang sila sa 20-16 pero parehong su­mablay ang dalawa niyang free throws kaya nakalapit ang Nueva Ecija.  

Bago sumalang sa finals ang Zamboanga City at Nueva Ecija ay pinatalsik muna nila sa semifinals ang Pasig-Sta. Lucia Realtors, 21-16 at Leg 3 winner Butuan City Uling Roasters, 20-19 ayon sa pagkakasunod.

Champion din ang Family’s Brand Sardines na binubuo ng nationals players kasama sina Troy Rike at Santi Santillan,  sa Legs 1, 2 at 4 kaya nasa top spot sila ng tour ranking tungo sa Grand Finals bukod pa sa karagdagang P300,000 premyo.