Eala isa sa siyam na awardees ng Tony Siddayao trophy ng PSA

MANILA, Philippines — Pamumunuan ni junior’s tennis sensation Alex Eala ang listahan ng mga bata at sumisikat na atleta sa SMC-PSA (Phi­lippine Sportswriters Association) Annual Awards Night.

Pormal na tatangga­pin ng 14-anyos na si Eala ka­sa­ma ang siyam pang mga batang atleta ang 2019 Tony Siddayao awards sa gala night sa Marso 6 sa Centennial Hall ng Manila Hotel.

Ibinibigay ang award, ipinangalan kay dating Manila Standard sports edi­tor Antonio ‘Tony’ Sid­dayao at ikinukunside­rang ‘Dean of Philippine sportswriting’, sa mga ba­tang atletang may edad 17-anyos pababa.

Tumapos si Eala sa top 10 ng world junior ran­kings sa pagtatapos ng 2019.

Matapos makamit ang grand slam title mula sa pag­rereyna sa nakaraang Australian Open girls doubles tournament katuwang si Priska Madelyn Nugroho ng Indonesia ay umakyat ang Filipina wonder sa No. 4 sa world rankings.

Makakasama ni Eala sa entablado sina beme­dalled age-group swimmers Micaela Jasmine Moj­deh at Marc Bryant Dula sa event na inorga­nisa ng pinakamatandang media organization sa pamumuno ni Tito S. Talao, ang sports editor ng Manila Bulletin at inihahandog ng Philippine Sports Commission, Milo, Cig­nal TV, Philippine Bas­ketball Association, Air­Asia at Rain or Shine.

Ang kukumpleto sa mga Siddayao awardees ay sina bowling pair Dale Lazo at Jordan Dinham, Juan Miguel Sebastian ng karatedo, golfer Celine Abalos, Woman FIDE Mas­ter Antonella Racasa, powerlifter Jessa Mae Ta­buan at netter Michael Eala.

Ang mga naunang nakatanggap ng nasabing award ay sina Grand Master Wesley So, Eumie Kie­fer Ravena, Felix Marcial, Jeron Teng, Mar­kie Alcala, Pauline Del Rosario, Aby Arevalo, Maurice Sacho Ilustre at iba pa. 

Nasa unahan ng 200 awar­dees ang paggawad ng sportswriting fraternity sa 30th Southeast Asian Games overall champion na Team Philippines bilang 2019 Athlete of the Year.