Bautista target ang silya sa 3rd round
MANILA, Philippines — Hangad ni Ian Clark Bautista na makahirit ng tiket sa third round sa men’s featherweight (57 kgs.) division ng 2019 AIBA World Boxing Championships sa Yekaterinburg, Russia.
Haharapin ng Asian Championships bronze medalist na si Bautista si Mirko Jehiel Cuello ng Argentina na nakahirit ng opening-round bye.
Target ni Bautista na masundan ang kanyang 5-0 unanimous decision win kay Viliam Tanko ng Slovakia sa first round.
Nakatakdang sumalang kagabi sina two-time Southeast Asian Games champion Eumir Felix Marcial at Carlo Paalam sa kani-kanilang dibisyon.
Sasabak si Marcial kontra kay No. 2 seed Tarik Allali ng Morroco sa men’s middleweight (75 kgs.) at lalabanan ni Paalam sa men’s flyweight class (52 kgs.) si Istavan Izaka ng Hungary.
Una nang nawala si Kuala Lumpur Southeast Asian Games gold medalist John Marvin na nagpasyang mag-withdraw sa second round ng light heavyweight division matapos magtamo ng sugat sa ibabaw ng kilay.
Yumuko naman si James Palicte sa first round ng men’s light welterweight (63 kgs.) kay Jose Manuel Wafara ng Colombia via 0-5 unanimous decision loss.
Target ng tropa na malampasan ang isang tansong medalyang nakuha ng Pilipinas noong 2015 edisyon.
- Latest
