Huling tsansa ng Gilas laban sa Iran

MANILA, Philippines — Bokyang kampan­ya ang tatangkaing maiwasan ng Gilas Pilipinas sa kanilang huling laban kontra sa Iran sa pagtatapos ng classification stage ng 2019 FIBA World Cup sa Wukesong Sports Arena sa Beijing.

Nakatakda ang harapan sa pagitan ng dala­wang Asian rivals nga­yong alas-8 ng gabi kung saan susubukan ng Nationals na maibulsa ang una at natatanging panalo sa prestihiyosong quad­rennial basketball showpiece sa China.

Subalit hindi iyon magiging madaling misyon para sa Phl team.

Kagagaling lang ng Nationals sa masakit na 67-86 kabiguan kontra sa African team na Tunisia na kailangan nilang ma­ipagpag kaagad sa krus­yal na laban kontra sa Iran.

Hawak ang 0-4 kartada sa Group N ng 17-32 classification stage dahil din sa kabiguan kontra sa Italy, Serbia at Angola sa group phase, kahiya-hiyang winless campaign ang nag-aabang sa Gilas kung hindi pa rin makakalusot sa pamilyar na ka­labang Iran.

Bagama’t tinalo ng Na­tionals ang Iran noong 2015 FIBA Asia Cham­pionship kung saan nag-silver medal sila sa likod ng nagharing China ay hindi nanalo ang Gilas sa Iran maski isang beses sa ginanap na 2019 FIBA World Cup Asian Qualifiers.

Dagdag pa rito ang 71-62 pana­lo ng Iran kon­tra sa Ango­la na hin­di pinaporma ang Gilas kaya’t kumpiyansang susuong sa duwelo kontra sa Nationals.

Mangunguna para sa atake ng Iran ang dala­­wang beteranong pam­ba­­to na sina Nikkhah Bah­rami at seven-foot-2 Hammed Had­dadi kontra naman kina 6’11 natura­lized center Andray Blatche, five-time PBA MVP June Mar Fajardo, Paul Lee, Japeth Aguilar at CJ Perez ng Gilas.

Hangarin ng Gilas ang mailap na tagum­pay para sa mas magandang kampanya sa 2019 edition ng World Cup na ma­layo sa kanilang pambi­hirang 2014 campain sa Spain kung saan sila nagtala ng 1-4 kartada subalit pinahirapan ang Argentina, Puerto Rico, Greece at Croatia bago nakalusot sa overtime kontra sa Sene­gal.