Walker kumamada para sa US team
MELBOURNE -- Nagpasabog si Boston Celtics guard Kemba Walker ng 23 points para pamunuan ang United States sa 102-86 paggupo sa Australia sa isang warm-up game kahapon.
Nagdagdag si Myles Turner ng 15 points at 14 rebounds, habang tumipa si Donovan Mitchell ng 13 markers at 3 assists bilang paghahanda sa 2019 FIBA World Cup sa China sa susunod na linggo.
Binanderahan naman ni Chris Goulding ang Australia sa kanyang 19 points sa harap ng 50,000 fans sa Melbourne’s Marvel Stadium.
“I’m one of the leaders of this team so I just try to do my best for my teammates,” wika ni Walker, hinirang na team captain para sa nasabing laro. “I’m super happy to be here. I want to inspire the young kids coming up.”
Nakatakdang pangalanan ni head coach Gregg Popovich ang Final 12 ng USA squad para sa 2019 FIBA World Cup.
Paborito pa rin ang mga Americans bagama’t hindi sumama sa tropa sina NBA superstar LeBron James, James Harden, Anthony Davis at Kawhi Leonard.
“One of our big mantras has been ‘composure and poise,’” sabi ni Popovich. “Things are going to go the other way in some games. And the way you respond to that is really the measure of how you’re going to do.”
Binuksan ng five-time world champions, ang World No. 1 sa listahan ng international governing body na FIBA, ang laro sa 6-0 bago pamunuan ni Patty Mills ang Australia sa pag-angkin sa first quarter, 22-20.
Isang 10-0 atake ang inilunsad ng Team USA tampok ang tatlong three-pointers para kunin ang 76-61 bentahe sa pagtatapos ng third period at hindi na nilingon pa ang mga Aussies.
- Latest
