Biado, De Luna tumumbok ng tiket sa quarterfinals
MANILA, Philippines — Tuloy ang mainit na ratsada nina dating world champion Carlo Biado at Jeff De Luna para makahirit ng tiket sa quarterfinal round ng prestihiyosong 2019 World Cup of Pool na ginaganap sa Morningside Arena sa Leicester.
Inilabas nina Biado at De Luna ang bangis ng mga Pinoy cue masters matapos irehistro ang 7-5 pananaig kina Klenti Kaci at Besar Spahiu ng Albania sa Round-of-16 ng torneong may basbas ng World Pool-Billiard Association.
Nauna nang tinalo nina Biado at De Luna sina Roman Hybler at Michal Gaven?iak ng Czech Republic mula sa bendisyon ng 7-6 desisyon sa first round ng event na may nakalaang $250,000 tampok ang $60,000 para sa magkakampeong pares.
Sunod na makakasagupa nina Biado at De Luna sina Filipino-Canadian Alex Pagulayan at Canadian Joshua Filler na nagsumite ng 7-6 panalo kina Mark Magi at Denis Grabe ng Estonia sa hiwalay na Round-of-16 game.
Umentra rin sa quarterfinals sina reigning champions Wu Jiaqing at Liu Haitao ng China na nagtala ng 7-6 panalo laban kina Enrique Rojas at Alejandro Carvajal ng Chile.
Makakalaban nina Wu at Liu sa quarters sina Marc Birjstenbosch at Niels Feijen ng Netherlands na umiskor ng 7-3 panalo kina Shane Van Boening at Skyler Woodward ng Amerika.
Ang iba pang quarterfinalists ay ang Greece na nanalo sa Chinese-Taipei (7-5), Finland na namayani sa Spain (7-5) at Great Britain na nagwagi sa Poland (7-5), at Austria na nanaig sa Hong Kong (7-5).
- Latest
