Split draw

Ancajas nanatiling super flyweight champion

MANILA, Philippines — Hindi ito ang inaasahan ni Filipino world super flyweight king Jerwin Ancajas na makikita niya kay Mexican challenger Alejandro Santiago.

Nauwi sa split draw ang bakbakan nina Anca­jas (30-1-2, 20 knockouts) at Santiago (16-2-5, 7 KOs) kahapon sa Ora­cle Arena sa Oakland, Ca­lifornia.

Nabigyan si Ancajas ng 116-112 points mula kay judge Micahel Tate, habang nakakuha si Santiago ng 118-111 kay judge Marshall Walker at nakita ni judge Chris Wilson ang laban sa 114-114.

Napanatiling suot ng tubong Panabo City, Da­vao Del Norte ang kan­yang International Bo­xing Federation (IBF) su­per fly­­weight crown.

“Medyo wala ako sa timing,” pag-amin ni Ancajas. “Iba ang ikinilos niya. Hindi ko rin siya mas­yadong mahuli.”

Inangkin ng 26-anyos na si Ancajas ang first hanggang third round, ha­bang nakabawi naman ang 22-anyos na si Santiago sa fourth at fifth round.

Sa round 11 ay namaga na ang kanang mata ni Ancajas hanggang ma­kipagsabayan kay Santiago sa round 12.

Ito ang ikalawang sunod na pagkakataon na na­bigong mapabagsak ni Ancajas ang kanyang kalaban matapos ang unanimous decision win laban kay Cebuano challenger Jonas Sultan noong Ma­yo 26 sa Fresno, California.

Hangad ngayon ni An­cajas na hamunin sina World Boxing Council king Srisaket Sor Rung­visai (46-4-1, 41 KOs) ng Thailand at World Bo­­xing Association tit­list Khalid Yafai (23-0-0, 14 KOs) ng United Kingdom para sa isang unification championship fight sa susunod na taon.

“We’re still focused on the big fights, to unify,” sabi ni matchmaker Sean Gibbons kay Anca­jas. “I can’t pin it down to one thing, I still go back to styles.”

Samantala, pinabagsak ni Filipino featherweight contender Gene­sis Servania (32-1-0, 15 KOs) si Mexican Carlos Carlson (23-0-5, 14 KOs) sa huling 44 segundo ng third round sa kanilang non-title fight sa undercard ng boxing event.