Live football action sa S+A

MANILA, Philippines — Maaksyong linggo sa mundo ng football ang handog ng S+A sa pagsasaere ng mga laban sa English Premier League (EPL) at La Liga ng Live, pati na ang inaabangang laban ni Philippine Azkals goalkeeper Neil Etheridge bilang miyembro ng Cardiff City kontra sa Burnley sa Setyembre 30.

Tampok na sa brodkast sa Huwebes ang Sevilla laban sa Real Madrid sa alas-3:55 ng umaga na live mula sa Ramon Sanchez Pizjuan Stadium.

Lilipat naman ang aksyon sa inaabangang S+A debut ni Philippine Azkals goalkeeper Neil Etheridge sa pagharap ng Cardiff City sa Burnley sa Linggo ng alas-10:55 pm. Mapapanood naman ng alas-12:55 ng umaga ang bakbakan ng dalawang higante sa EPL na Chelsea at Liverpool.

Kauna-unahang Pinoy na nakapaglaro sa prestihiyosong liga si Etheridge nang buksan niya ang taon bilang starting goalkeeper ng Cardiff City noong Agosto. Maraming bumilib sa kakayahan ng 28-anyos na goalie na naging dahilan kung bakit siya naisama sa mga nominado para sa August Player of the Month ng liga.