Lucas Matthysse ‘di lalaban kung...
MANILA, Philippines — Hindi lalabanan ni Argentinian world welterweight titlist Lucas Matthysse si Filipino boxing superstar Manny Pacquiao na hindi kumpleto ang kanyang tatanggaping premyo.
Sa panayam ng ABS-CBN mula sa California, USA ay sinabi ni chief trainer Joel Diaz na kailangan muna nilang matanggap ang natitirang $2 milyon mula sa MP Promotions ni Pacquiao bago magtungo sa Kuala Lumpur, Malaysia.
“My worry is, if the money is not there, we are not traveling because we are not gonna go [sic] fight for free,” sabi ni Diaz, dating trainer ng nagretiro nang si World Boxing Organization welterweight king Timothy Bradley, Jr.
Itinakda ang laban nina Pacquiao (59-7-2, 38 KOs) at Matthhysse (39-4, 36 KOs) sa Hulyo 15 sa Axiata Arena sa Kuala Lumpur, Malaysia.
Itataya ng 35-anyos na si Matthysse ang kanyang suot na World Boxing Association welterweight belt laban sa 39-anyos na si Pacquiao.
Nauna nang nagbigay ang MP Promotions ni Pacquiao ng $500,000 sa grupo ni Matthysse at Oscar De La Hoya ng Golden Boy Promotions.
Hinihintay na lang ang $2 milyon na kulang ng boxing promotion ng Senador na ilalagay sa isang escrow account.
Ayon kay Diaz, wala pa silang nakikitang commercial na bakbakan nina Pacquiao at Matthysse sa United States.
“Up to this day I have not seen commercials on ESPN of the fight, no promotions, nothing,” wika ni Diaz na umaasang matutuloy ang nasabing laban sa kabila ng mga report. “We know we are dealing with professionals, so that’s the reason we keep training,” ani Diaz. “It’s not a distraction to us, you know, all my respects for Manny and he’s putting in the work to make this happen, it will happen.”
Sinabi pa ng trainer na kung makakansela ang laban nina Matthysse at Pacquiao ay tuluyan nang magreretiro ang Argentinian star.
- Latest
