Bagong image ni Van Opstal
MANILA, Philippines - Matapos ang apat na laro ay hindi pa rin ginagamit ni coach Leo Austria ng nagdedepensang San Miguel si Gilas Pilipinas pool member Arnold Van Opstal sa kasalukuyang 2016-2017 PBA Philippine Cup.
May nakitang paraan ang 6-foot-7 na si Van Opstal para mapansin siya ni Austria mula sa bench.
Pinakulayan ng dating La Salle Green Archers center ang kanyang buhok ng silver purple kagaya kay Olympic swimmer Ryan Lochte ng United States.
Dahil dito ay binansagan ng kanyang mga teammates sa San Miguel si Van Opstal bilang ‘Jack Frost,’ ang comic book superhero at miyembro ng Liberty Legion.
“They all like it,” sabi ng 24-anyos na back up center matapos ang 94-91 panalo ng Beermen laban sa Mahindra Floodbusters noong Linggo.
“They’re making fun of me at first, but they’re all supportive. They’re nice guys.”
Sinabi naman ni Austria na hindi niya basta-basta magagamit si Van Opstal lalo na at nasa krusyal na bahagi ang laro ng San Miguel at Mahindra.
“I like to use a lot of players but with the game on the line, I cannot gamble,” wika ni Austria.
Umaasa si Van Opstal na sa susunod na laro ng Beermen ay tatapikin na siya ni Austria para sa kanyang PBA debut.
- Latest
