MANILA, Philippines – Tumapos na may 16 puntos si Candice Magdaluyo upang manguna para sa University of Santo Tomas nang padapain ang Adamson University, 74-70 at mapanatiling buhay ang tsansa nilang pumasok sa Final Four round kahapon sa UAAP Season 79 women’s basketball tournament sa Mall of Asia Arena sa Pasay City.
Kasunod ni Magdaluyo sina Shanda Anies, na may 14 puntos, 6 rebounds, 5 assists at 4 steals, at Jhenn Angeles na may 12 puntos para sa naturang panalo ng Tigresses na nag-aasam na makahanay ng defending two-time champion National University, De La Salle at University of the East sa susunod na round.
Umangat ang UST sa barahang 6-7 panalo-talo sanhi ng nasabing panalo habang bumaba naman ang Lady Falcons sa 5-7 na marka.
Sa isa pang laro sa pagitan ng kapwa eliminated nang mga koponan ng University of the Philippines at Far Eastern University, nakaungos ang una, 46-44 para sa ikalawa nilang panalo sa loob ng 12 laban. FML