MANILA, Philippines – Matapos ang Alaska ay ang San Miguel naman ang nakatikim ng una nilang pagkatalo sa mid-season conference.
Pinaulanan ng Mahindra Enforcers ng three-point shots ang Beermen para kunin ang 102-96 panalo sa 2016 PBA Commissioner’s Cup kagabi sa Alonte Sports Arena sa Biñan, Laguna.
Kumamada si Aldrech Ramos ng 26 points tampok ang matinding 6-of-7 shooting sa 3-point range, habang nagsalpak si Niño ‘KG’ Canaleta ng tatlong sunod na tres sa fourth quarter para sa 2-1 record ng Mahindra.
“Very tough game for us coming from a loss. We just need that mental toughness in the end,” sabi ni coach Chito Victolero sa naunang kabiguan ng kanyang Enforcers sa Blackwater Elite noong Pebrero 14. “My players stepped up especially KG Canaleta in the fourth quarter.”
Nagdagdag si point guard LA Revilla ng 19 markers, habang may tig-15 markers sina Canaleta at import Augustus Gilchrist, humakot ng 13 rebounds.
Ito ang unang laro ng San Miguel matapos magkampeon sa nakaraang PBA Philippine Cup kung saan sila bumangon mula sa 0-3 pagkakabaon para talunin ang Alaska sa kanilang best-of-seven championship series.
Ang pang-lima at huling tres ni Ramos sa natitirang 47 segundo sa second period ang nagbigay sa Enforcers ng 51-45 abante bago naagaw ng Beermen ang 86-84 bentahe sa fourth period
Ang tatlong sunod na tres ni Canaleta ang muling nag-angat sa Mahindra sa 93-86 sa 3:22 minuto ng laro hanggang makadikit ang San Miguel sa 93-96 matapos ang 3-point play ni import Tyler Wilkerson.
Kumonekta si Ramos ng dalawang free throws na sinundan ng split ni Revilla para muling ilayo ang Enforcers sa 99-93 sa huling 1:14 minuto ng laro.
Umiskor si Wilkerson ng 29 points sa panig ng Beermen kasunod ang 17 ni Arwind Santos, 14 ni Marcio Lassiter at tig-8 nina back-to-back Most Valuable Player June Mar Fajardo, Ryan Araña at Chris Ross.
Samantala, tinalo naman ng NLEX ang minamalas na Star, 106-99, para sa kanilang ikalawang panalo.
MAHINDRA 102 - Ramos 26, Revilla 19, Canaleta 15, Gilchrist 15, Dehesa 10, Guinto 9, Digregorio 4, Pinto 2, Yee 2, Webb 0, Jaime 0.
San Miguel 96 - Wilkerson 29, Santos 17, Lassiter 14, Araña 8, Fajardo 8, Ross 8, Heruela 5, Tubid 4, Espinas 3, Lutz 0, Reyes 0.
Quarterscores: 24-23; 51-45; 74-69; 102-96.
NLEX 106 - Thornton 35, Lanete 21, Taulava 14, J. Villanueva 12, Alas 10, Anthony 9, Enciso 3, Reyes 2, Borboran 0, Khobuntin 0, Wilson 0, E.Villanueva 0.
Star 99 - Bowles 30, Maliksi 21, Simon 21, Yap 10, Pingris 9, Barroca 6, Melton 2, Torres 0, Sangalang 0, Reavis 0, Pascual 0.
Quarterscores: 22-26; 50-55; 77-82; 106-99.