Pacquiao, Bradley kapwa may ipinaglalaban

MANILA, Philippines – Higit pa sa kanilang sa­rili ang ipaglalaban ni­na Filipino world eight-di­vision champion Manny Pacquiao at American world welterweight titlist Ti­mothy Bradley, Jr.

Ayon kay Teddy Atlas, ang chief trainer ni Bradley, parehong nakataya sa upakan nina Pacquiao at Bradley ang karangalan ng kanilang mga bansa.

“Pacquiao brings ex­plo­siveness, quick hands and quick feet,” sabi ni At­las sa Bo­xingScene.com. “He brings more than that because he’s fighting for his people in the Philippines, there’s a great strength to that.”

“Timothy fights for his family and his people in this country,” dagdag pa nito kay Bradley, itataya ang suot na World Bo­xing Organization welterweight crown kontra kay Pacquiao.

Nakatakda ang pa­ngat­long pagtutuos ng 37-anyos na si Pacquiao at ng 33-anyos na si Bradley sa Abril 9 sa MGM Grand sa Las Vegas, Nevada.

Ginulat ni Bradley si Pac­quiao sa una nilang pag­kikita noong Hunyo ng 2012 matapos itakas ang kontrobersyal na split decision victory.

Nakaresbak naman ang Filipino boxing su­per­star matapos kunin ang kumbinsidong unanimous decision win sa kanilang rematch noong Abril ng 20­14.

Determinado si ‘Pacman’ na muling talunin si Bradley para sa kanyang pinakahuling laban ma­tapos mabigo kay Floyd Mayweather, Jr. sa kanilang super fight no­ong Mayo 2.