Spurs malinis pa rin sa kanilang homecourt

SAN ANTONIO -- Nagiging madali ang bawat panalo ng San Antonio Spurs kapag nabibigyan ng sapat na pahinga ang kanilang mga stars kasabay ng pagbibigay ng mahabang minuto sa mga role players.

Umiskor si Tim Duncan ng season-high na 18 points at nakahugot ang Spurs ng double figures sa walo nilang players para kunin ang 123-98 panalo laban sa Utah Jazz.

Dinuplika ng San Antonio (31-6) ang kanilang best start sa franchise history sa pagsikwat sa kanilang ika-21 sunod na home game win ngayong season.

“We’re going through the process of trying to get better every game,’’ wika ni Spurs forward David West, nagtala ng mga season highs sa points (18) at rebounds (13). “Continue to protect our home court and continue to focus on our defense. Regardless of who plays, we’re trying to make sure that we attempt to make it perfect. Even though perfection is not a possibi-lity, we’re still looking to achieve it.’’

Sa Washington, sinalo ni Kyrie Irving ang naiwang trabaho ni LeBron James para igiya ang Cleveland Cavaliers sa 121-115 panalo laban sa Wa-shington Wizards.

 Tumipa si “King” James ng 30 sa kanyang 34 points sa unang tatlong quarters, habang humugot si Irving ng 19 sa kanyang 32 markers sa fourth period para balikan ng Cavaliers ang Wizards na tumalo sa kanila, 97-85 noong December 1 sa Cleveland.

“It was in the front of our mind,”sabi ni James sa kanilang tanging home loss ngayong season. “We know what they did to us. We just wanted to try to get some give-back.”

Naglista din si James ng 10 rebounds para tulungan ang Eastern Conference leaders na maitala ang 18-point lead sa third quarter.

Nakatabla ang Wizards sa 95-95 sa 10:53 minuto ng fourth period bago kumamada si Irving para sa Cavaliers, nakahugot kay guard J.R. Smith ng 25 points.

Pinamunuan ni Garrett Temple ang Wizards sa kanyang 21 points para sa Wizards, habang nag-ambag si John Wall, ang Eastern Conference player of the month, ng 20 points at 12 assists.