TORONTO – Nagsalpak si Kyle Lowry ng 27 points at nagdagdag si Terrence Ross ng 22 markers, habang kumolekta si Bismack Biyombo ng career-high na 15 points at 13 rebounds para tapusin ng Raptors ang kanilang three-game skid sa pamamagitan ng 102-93 panalo laban sa Los Angeles Lakers.
Sa kanyang pinakahuling NBA appearance sa Canada, tumipa si Kobe Bryant ng 8-of-16 fieldgoals shooting at tumapos na may 21 points para sa Lakers na winalis ng Raptors sa kanilang season series sa unang pagkakataon.
Sa tuwing mahahawakan ni Bryant ang bola ay hindi magkamayaw ang kanyang mga fans sa pagsigaw ng kanyang pangalan.
Lalong nag-ingay ang kanyang mga fans nang maipasok ni Bryant ang isang 3-pointer sa fourth quarter para sa paghahabol ng Lakers.
Tuluyan nang ipinahinga si Bryant sa natitirang 24.6 segundo na sinabayan ng standing ovation.
Sa Minneapolis, humakot si DeAndre Jordan ng 20 points, 12 rebounds at 4 blocks para tulungan ang Los Angeles Clippers na talunin ang Minnesota Timberwolves, 110-106.
Naglista naman si Blake Griffin ng 16 points at 11 rebounds, habang muling nagbalik si Chris Paul sa lineup matapos magpahinga sa kanilang nakaraang dalawang laro dahil sa rib injury.