MANILA, Philippines – Tinapos ng UP Lady Maroons ang 25-game losing streak sa UAAP women’s basketball sa pamamagitan ng 46-39 tagumpay laban sa Adamson Lady Falcons sa pagbubukas ng second round noong Linggo sa Blue Eagle Gym.
Hindi naging sagabal ang face mask na suot ng beteranang si Bea Daez nang tumapos siya taglay ang 13 puntos. Ang kanyang enerhiya ay dumaloy din sa mga kakampi para makatikim uli ng panalo ang Lady Maroons na huling nangyari noon pang 2013.
May 1-7 baraha ang UP at hindi na sila solong nasa huling puwesto dahil kapantay na nila ang FEU Lady Tamaraws na yumuko sa Ateneo Lady Eagles, 60-51.
Kinuha ng nagdedepensang kampeon National University Lady Bulldogs ang ikawalong sunod na panalo sa 80-40 pagdurog sa UE Amazons habang lumawig sa pito ang dikit-dikit na tagumpay ng La Salle Lady Archers sa inaning 70-63 tagumpay sa UST Tigresses.
Ang Lady Bulldogs na humugot ng 25 puntos kay Shelly Gupilan ay may 24-0 karta na kung isasama ang 16-0 sweep noong nakaraang taon habang ang Ateneo, UE at UST ay magkakasalo sa 4-4 karta.