Wall sinapawan si Rose sa panalo ng Wizards sa Bulls
WASHINGTON -- Una si Chris Paul. Ngayon ay si Derrick Rose.
Tinalo ni John Wall ang dalawa sa mga top point guards sa NBA.
Nagtala si Wall ng 16 points at 12 assists para pasiklaban si Rose sa 102-86 panalo ng Washington Wizards kontra sa Chicago Bulls.
Tinapos ng lider sa All-Star votes sa hanay ng mga Eastern Conference guards ang kanyang 0-5 record kay Rose.
Nauna nang winakasan ni Wall ang kanyang 0-6 kamalasan sa kanilang one-on-one ni Paul sa tagumpay ng Wizards laban sa Los Angeles Clippers.
“Didn’t I finally beat Chris and Derrick this year?” nakangiting wika ni Wall. “It’s a good year. It’s a good start. It’s finally good to beat them.”
Si Rose ay ang No. 1 overall pick ng NBA draft noong 2008, habang si Wall ang top selection noong 2010.
Tinalo ng Wizards ang Bulls, 3-2, sa kanilang first-round playoff series noong nakaraang taon kung saan hindi nakapaglaro si Rose dahil sa kanyang knee surgery.
“You can tell he worked on his game,” ani Rose kay Wall. “Tonight, they jumped on us. It wasn’t about the matchup, I would say. They jumped on us pretty quick from the beginning.”
Naimintis ng Bulls ang 20 sa una nilang 24 shots at tinambakan ng Wizards, 30-10, sa first quarter.
Tumapos si Rose na may 19 points mula sa kanyang 8-for-19 fieldgoal shooting.
Sa San Antonio, tinalo ng Spurs ang Phoenix Suns, 100-95, sa kabila ng malamyang paglalaro nina Tim Duncan, Tony Parker at Manu Ginobili.
Umiskor si Danny Green ng 20 points para pangunahan ang Spurs.
Umiskor ang San Antonio ng season-high na 41 points sa final quarter laban sa Phoenix.
- Latest
