Sa taong 2014 bumandera si Pacquiao sa boxing at nakapaglaro sa PBA

MANILA, Philippines - Sa taong 2014 ay na­tupad ni Filipino world eight-division champion Manny Pacquiao ang isa sa kanyang mga pa­ngarap at ang muling pag­semento sa kanyang pa­ngalan bilang best ‘pound-for-pound boxer’ sa buong mundo.

Matapos resbakan si Timothy Bradley, Jr., tumalo sa kanya no­ong Hunyo ng 2012, sa kanilang rematch no­ong Abril para mu­ling maisuot ang World Bo­xing Organization (WBO) welterweight belt, ay tinutukan naman ni Pacquiao ang isa pang sport na malapit sa kanyang puso -- ito ay ang bas­ketball.

Sa taas na 5-foot-6 at edad na 35-anyos ay hi­nirang ng Team Kia si Pacquiao bilang No. 11 overall pick sa 2014 PBA Rookie Draft no­ong Agosto.

Ginawa ni Pacquiao ang PBA debut sa 80-66 panalo ng Kia laban sa expansion team na Blackwater sa pagbubu­kas ng 40th season ng PBA Noong Oktubre 19 sa Philippine Arena sa Bo­caue, Bulacan.

At matapos ang natu­rang tagumpay ay 10 mag­kakasunod na ka­ma­lasan ang nalasap ng So­rento para sa maaga ni­lang pagkakasibak ka­sama ang Elite.

Isinabay ni Pacquiao sa kanyang trabaho bilang playing coach ng Kia ang paghahanda ni­ya kay American chal­lenger Chris Algei­ri.

Anim na beses pi­nabagsak ni Pacquiao ang 5’10 na si Algieri sa kabuuan ng 12 rounds pa­tungo sa kanyang una­nimous decision victory para mapanatiling suot ang World Boxing Organization welterweight crown noong Nob­yembre 23 sa Macau, China.

Matapos ang kanyang panalo kay Algieri ay tahasang hinamon ni Pac­quiao si American world five-division titlist Floyd Mayweather, Jr.

Halos dalawang linggong inasar ni Maywea­ther si Pacquiao sa so­cial media matapos mag­lagay ng Instagram post kung saan napabagsak ni Juan Manuel Mar­quez si ‘Pacman’ na si­nabayan ng kanyang ‘Another One Bites the Dust’ ng bandang Queen.

Sinabi rin ni May­wea­ther na kaya siya gus­tung-gustong la­ba­nan ni Pacquiao ay dahil sa bumabagsak nitong po­­pularidad at kakapusan sa pera.

Sa isang panayam ng Showtime sa Dallas ay ti­nanggap ni Maywea­ther ang nasabing ha­mon sa kanya ni Pacquiao.

Itinakda niya sa Ma­yo 2 na kilala bilang ‘Cinco De Mayo’ na petsang ipinagdiriwang ng mga Mexicans.

Sinabi nina Bob Arum ng Top Rank Pro­mo­tions at Oscar De La Hoya ng Golden Boy Promotions na malabo itong mangyari sa natu­rang petsa dahil walang dugong Mexicano sina Pacquiao at May­wea­ther.

Idinagdag ni De La Ho­ya, pinagretiro ni Pac­quiao noong 2008 matapos umiskor ng eight-round stopppage, na masyadong kompli­kado ang pagpaplantsa ng mega showdown ni­na Pacquiao at Mayweather.

Kaya naman hanggang sa ngayon ay hindi pa rin ito matuluy-tuloy.

“I’ve heard it for about five years. It’s very complicated,” wika ni De La Hoya.

Ibinunyag ni Arum na nakikipag-usap na siya kay CBS CEO (Chief Executive Officer) Les Moonves para sa laban nina Pacquiao at Mayweather sa susunod na taon.

Ang 35-anyos na si Pac­quiao (57-5-2, 38 KOs) ay nasa bakuran ng HBO, habang ang 37-anyos na si Maywea­ther (47-0-0, 26 KOs) ay nasa Showtime ng CBS.

Sinabi ni Pacquiao na maniniwala lamang siya sa pahayag ng 37-anyos na si Mayweather kung makikita niya ang pirma nito sa kanilang fight contract.

May iba namang op­syon na nakahanda si Arum kung hindi na naman maitakda ang Pacquiao-Mayweather fight ngayong taon.

Maaaring itapat ng 83-anyos na si Arum kay Pacquiao ang sinuman kina WBO light wel­terweight king Terrence Crawford (25-0-0, 17 KOs), WBC champion Danny Garcia (29-0-0, 17 KOs) at WBA title holder Jessie Vargas (26-0-0, 9 KOs).