MANILA, Philippines - Binuhay ni Jeff Viernes ang opensa ng Racal Motors sa ikatlong yugto upang pamunuan ang 77-66 panalo sa Jumbo Plastic Giants sa PBA D-League Aspirants’ Cup kahapon sa JCSGO Gym sa Cubao, Quezon City.
Ibinagsak ni Viernes ang lahat ng kanyang 19 puntos sa second half at 13 rito ay ginawa sa ikatlong yugto kung saan na-outscore nila ang naunang lumamang na Giants, 31-17, para hawakan na ang mando sa bakbakan.
“I was really disappointed with the way we played in our last game. But for this game, the boys responded well,” wika ni Racal Motors coach Caloy Garcia na nakuha ang ikalawang panalo matapos ang anim na laro.
May dalawang three-pointers si Viernes sa nasabing yugto at pinasiklab ang 22-10 palitan upang ang 36-38 iskor ay naging 58-48 kalamangan.
Si Jason Ibay ay mayroong 16 puntos at si Jamil Ortuoste ay may 10 para sa Alibaba na ginamitan din ng magkakaibang depensa ang Giants na nagresulta sa 23 errors.
May 10-of-27 fieldgoal shooting ang Racal sa 3-point line kumpara sa 5-of-23 ng Jumbo.
Naitabla ng AMA University Titans ang baraha sa 3-3 nang pataubin ang Bread Story-LPU Pirates, 97-89, sa ikalawang laro.
Lumamang ng hanggang 25 puntos ang Titans, 81-56, sa unang minuto ng huling yugto pero nagpabaya sila para makabalik ang Pirates.
Ang steal tungo sa transition points ni Jiovani Jalalon ang nagpababa sa kalamangan sa limang puntos, 91-86.
Ngunit bumanat ng apat na puntos si Philip Paniamogan para ilayo uli ang AMA sa pito, 95-88, at ipalasap sa Pirates ang ikaapat na kabiguan laban sa dalawang panalo.
May 17 puntos si Paniamogan sa ilalim ng 19 puntos ni Joseph Eriobu, habang si Jay-R Taganas ay nag-ambag ng 15 puntos at 18 rebounds. (ATan)
RACAL 77 – Viernes 19, Ibay 16, Ortuoste 11, Ruaya 9, Jamito 6, Gil 5, Canta 5, Gabawan 4, Saitanan 2, Mercader 0, DiGregorio 0.
Jumbo Plastic 66 – Cruz 14, Terso 12, Eguillos 10, Villamor 9, Rios 6, Rosales 5. Maiquez 5, Magat 3, Javier 2, King 0, Colina 0.
Quarterscores: 12-13; 27-33; 58-50; 77-66.
AMA University 97 – Eriobu 19, Paniamogan 17, Taganas 15, Martinez 10, Balucanag 9, Olivares 8, Cubillo 7, Camasura 6, Sabangan 6, Jordan 0, Diswe 0.
Bread Story-LPU 89 – Vigil 25, Jalalon 18, Corpuz 12, Mbomiko 12, Gamboa 9, Bulawan 5, Gabayni 4, Lao 2, Zamora 2, Baltazar 0, Taladua 0, Elmejrab 0, Daquioag 0, Bangga 0.
Quarterscores: 26-13; 50-39; 75-56; 97-89.