Batang Gilas ‘di nakaporma sa lakas ng US squad

DUBAI -- Kagaya ng inaasahan, inilampaso ng nagdedepensang United States ang Philippine Team, 124-64, sa FIBA U17 World Championship noong Lunes ng gabi dito sa Al Ahli Arena.

Kumamada sa labas sina Terrance Ferguson at Josh Jackson, habang nagdomina sa loob ang mga big men na sina Diamond Stone at Henry Ellenson para sa 29-point halftime lead ng Americans sa Batang Gilas.

At mula dito ay hindi na nakalapit ang mga Pinoy.

Binanderahan ng United States ang Group A sa kanilang 3-0 record na kabaligtaran sa 0-3 baraha ng Batang Gilas.

“They’re (Americans) the best but we’re able to play our hearts out and that’s the bottomline,’’ sabi ni Batang Gilas coach Jamike Jarin.

Umiskor si Jolo Mendoza ng 19 points kasunod ang 12 ni Jollo Go at 10 ni Richard Escoto para sa Nationals na nakatakdang labanan ang France sa isang knockout match na magdedetermina sa papasok sa quarterfinals.

“We just kept fighting and never gave up. We just need to keep our heads up that we played our best and the hardest and we’re looking forward to the knockout phase tomorrow (Tuesday),’’ wika ni Jarin.

Ibinaon ng Americans ang Filipinos sa 61-32 sa halftime, ngunit pinuri pa rin ni Team USA coach Donald Showalter ang Batang Gilas.

“I told my players not to overlook the Philippines and give it all. We saw them play, they’re scrappy and very well coached,’’ ani Showalter.