Gilas pasok sa q’finals

MANILA, Philippines - Ipinakita ni Ranidel De Ocampo ang kanyang pagiging beterano.

Nagsalpak ang 6-foot-6 na si De Ocampo ng isang running basket at krusyal na three-point shot sa dulo ng fourth quarter para igiya ang Gilas Pilipinas sa 71-70 panalo laban sa Jordan sa 5th FIBA-Asia Cup sa Wuhan, China kagabi.

Tumapos si De Ocampo na may 14 points, tampok dito ang 4-of-7 shooting sa 3-point range at 6 rebounds, habang umiskor si Paul Lee ng 10 sa kanyang team-high na 16 markers sa second half.

Ito ang ikatlong sunod na panalo ng Nationals sa Group B papasok sa quarterfinal round ng torneong nilalahukan ng mga club teams.

Inaasahang makakatapat ng Gilas Pilipinas (3-0) sa quarterfinals bukas ang India (2-2) na ginulat ang China (3-1), 65-58, sa Group A noong Linggo.

Matapos magtabla sa first half, 30-30 ay lumamang ang Jordan, hinawakan ni dating Gilas Pilipinas mentor Rajko Toroman, sa 37-33 sa unang limang minuto sa third period mula sa basket ni World Cham-pionship veteran Rasheim Wright.

Naagaw ng Nationals ang unahan sa 66-62 buhat sa drive ni LA Tenorio sa 2:59 ng fourth quarter kasunod ang isang three-point play ni Wright na nagdikit sa Jordanians sa 65-66 sa 2:25 minuto nito.

Isang basket ni De Ocampo ang naglayo sa Gilas Pilipinas sa 68-65 bago nakatabla ang Jordan sa 68-68 sa likod nina Ahmad Alhamarsheh at Wright sa huling 42.8 segundo.

Nagsalpak naman si De Ocampo ng tres para ibigay sa Nationals ang 71-68 bentahe sa natitirang 35.2 segundo. (RC)