Brazil mapapalaban sa Colombia

TERESOPOLIS – Nakapasok ang Brazil at Colombia sa World Cup quarterfinals na may magkaibang pananaw.

Ang Brazil ay nababalutan ng pagdududa dahil sa kanilang mahinang simula habang mainit naman ang Colombia matapos ang kanilang impresibong performance at apat na sunod na panalo.

Habang nahirapan ang host team na talunin ang Chile sa penalty shootout para di masibak sa second round, ang Colombia ay may kumbinsidong 2-0 panalo laban sa Uruguay para makarating sa quarterfinals sa unang pagkakataon.

Magsasagupa ang dalawang koponang ito  nitong Biyernes sa Fortaleza kung saan hangad ng Brazil na panatilihing buhay ang kanilang kampanya para sa ikaanim na World Cup title at hangad naman ng Colombia na ipagpatuloy ang kanilang pananalasa.

Bagama’t may winning tradition ang Brazil at may home-field advantage, hindi sila ang paboritong manalo.

Sa Rio de Janeiro, mauunang magsagupa ang France at Germany.

Ang iba pang quarterfinals match na ilalaro nitong Sabado ay ang Argentina vs Belgium sa Brasilla at Netherlands vs Costa Rica sa Salvador.