Haya dinapuan ng kamalasan sa semifinals ng World 9-Ball

MANILA, Philippines - Mga krusyal na errors ang dumiskaril sa hanga­rin  ni Elmer Haya na pu­masok sa finals nang la­sapin ang 7-11 pagka­talo kay Niels Feijen ng Ne­therlands sa semifinals ng World 9-ball Cham­pionship noong Biyernes sa Al Saad Sports Club sa Do­ha,Qatar.

Nagsimulang duma­po ang kamalasan sa 37-anyos na pool player na nagtatrabaho sa Abu Dha­bi sa ninth rack nang ku­manto ang tangkang pag­huhulog sa bola sa 4-ball para kunin na ni Fei­jen ang kalamangan sa laro, 5-4.

Na-scratch pa ang cue-ball sa 10th rack para gawing 4-6 ang iskor at ka­hit nakapanakot pa si Ha­ya na itatabla ang laro sa 14th rack ay kumapit pa rin ang malas sa kanya nang ma-scratch ang cue-ball matapos pumasok ang 8-ball.

Pakonsuwelo na lamang  ni Haya ay ang ka­to­tohanang ito ang unang pag­kakataon na nakaa­ban­te siya sa knockout round at nakahagip siya ng $7,500.00 upang maitala ang pinakamalaking ki­nita sapul nang magbil­yar noong 2004.

Nakumpleto ni Feijen ang magandang ipinakita sa kompetisyong sinalihan ng 128-manlalaro dahil siya rin ang kinilalang kampeon matapos talunin si Albin Ouschan ng Austria, 13-10.

Ito ang unang titu­lo sa kompetisyon ni Fei­jen para masungkit ang $30,000.00 unang gan­­­timpala mula sa kabu­uang $200,000.00 na pi­nagla­ba­nan.