Gilas Pilipinas kontra sa PBA All-Stars ngayon

MANILA, Philippines - Parehong seseryosohin ng Gilas Pilipinas at ng PBA All-Stars ang ka­nilang laro sa 2014 PBA All-Star Game ngayong alas-5 ng hapon sa Mall of Asia Arena sa Pasay City.

Sa kanilang unang pag­haharap noong naka­raang taon sa Digos City ay nauwi sa 124-124 ang iskor matapos ang buzzer-beating three-point shot ni Jeff Chan.

Tiniyak ni PBA All-Star coach Tim Cone na hindi na aabot sa 124 points ang Nationals ni men­tor Chot Reyes.

“It’s not going to be fun. It’s going to be serious. It will be a battle,” sa­bi ni Cone ng San Mig Coffee.

Ito ang unang pagka­kataon na muling nagsa­ma­-sama ang Gilas Pi­lipinas matapos kunin ang silver medal sa 2013 FIBA-Asia Men’s Championships na inilaro din sa MOA Arena.

Ang Gilas Pilipinas, kasama ang gold meda­list na Iran at bronze medal winner na South Korea, ang kakatawan sa Asya sa 2014 FIBA World Cup sa Spain.

Ayon kay Cone, gusto nilang tulungan ang Nationals para sa pagha­handa nito sa 2014 FIBA World Cup.

Kaya iba-ibang depensa ang kanilang ipapalasap sa Gilas Pilipinas.

Ang dalawang pana­lo ng koponan sa group plays ang tiyak nang mag­papasok sa kanila sa knockout stage ng FIBA World Cup.

Ang Gilas Pilipinas ay nasa grupo ng  Argentina, Greece, Puerto Rico, Croa­tia at Senegal.

“It’s a good opportunity for us to get together again since last August, but I’m not really expecting much,” wika ni Reyes.

Muling babanderahan nina 6-foot-11 naturalized center Marcus Douthit, Jim­my Alapag, Jayson Cas­tro at Chan ang Gilas Pilipinas katuwang si­na LA Tenorio, Japeth Aguilar, June Mar Fajar­do, Marc Pingris, Gabe Norwood, Ranidel De Ocampo, Gary David, Larry Fonacier at reserve player Beau Belga.

Sina Jared Dillinger at Paul Lee ang pinakahu­ling idinagdag ni Reyes sa national pool matapos tumanggi sina seven-foot rookie Greg Slaughter ng Barangay Ginebra at Marcio Las­siter ng San Miguel Beer.  

Ang PBA All Stars ay binubuo nina Slaughter, James Yap, Arwind Santos, Mark Barroca, Chris Ellis, Mac Baracael, Calvin Abueva, Marcio Lassiter, Sonny Thoss, Joe Devance, Niño ‘KG’ Canaleta at PJ Simon.

Naglagay ang PBA Board ng cash prize na P100,000 para sa mananalo sa pagitan ng Gilas Pilipinas at PBA All-Stars.