Wesley pasok sa 2nd round ng 2013 World Chess Cup

MANILA, Philippines - Nagmartsa sa second round si Filipino Grand­mas­ter Wesley So maka­raang gibain si GM Ale­xander Ipatov ng Turkey, 1.5-0.5, sa 2013  World Chess Cup sa Scandic Hotel sa Tromso, Norway.

Gamit ang puting piyesa, tinalo ng 33th seed na si So (ELO 2708) ang No. 96th seed na si Ipatov (ELO 2583) sa 45  moves ng Petroff Defense sa una ni­lang laro sa standard play.

Muling pinayukod ng 19-anyos na si So ang 20-anyos na si Ipatov sa pamamagitan ng 59 moves ng Grunfeld Defense, Exchange Variation ga­mit ang itim na piyesa.

Makakaharap ni So sa second round ang mana­na­lo sa pagitan nina No.32 seed   GM   Evgeny To­ma­shevsky ng Russia (ELO 2709)  at  No. 97 GM Alejandro Ramirez  (ELO 2583)  ng  United States.

Nagtabla sina Toma­shev­sky at Ramirez sa una nilang laro.

Noong 2009  sa Khan­ty Mansiysk, Russia ay gi­nitla ni So si da­ting world championship can­didates GM Vassily Ivan­chuk ng Ukraine, 1.5-.5, sa second round at isinu­nod si American GM Ga­ta Kamsky, 1.5-.5, sa third round patungo sa quarterfinals.

Winakasan ni GM Vla­dimir Malakhov ng Rus­sia ang ratsada ni So, 4-1, sa rapid tiebreak.

Samantala, nabigo naman si­na 100th seed GM Oliver Barbosa (ELO 2572) at 110th seed GM Mark Pa­ragua (ELO 2545)  sa ka­ni-kanilang mga laro sa 128-player, knockout-style event na inorganisa ng FIDE (World Chess Fe­deration).

Natalo si Barbosa kay 29th seed GM Le Quang Liem (ELO 2712) ng Viet­nam at sumadsad si Pa­ragua kay 28th seed GM Dmitry Jakovenko ng Russia (ELO 2724)  sa ka­ni-kanilang two-game stan­dard play.

Ang iba pang puma­sok sa second round ay si­na 2nd seed GM  Fabiano Caruana (ELO 2796) ng Italy, 3rd seed GM Valdimir Kramnik ng Russia, 4th seed GM Alexander Grischuck (ELO 2780) ng Russia  at 5th seed GM Hi­karu Nakamura (ELO 2772) ng United States.

Sa ladies division, na­kipag-draw naman si da­ting wo­men world cham­pion GM Hou Yifan ng Chi­­na kay GM Alexie Shi­­rov.