NU Spikers tangka ang Final 4

MANILA, Philippines -  Tangka ng mainit na National U na makuha ang unang ticket sa Final Four sa pakikipagharap sa mapanganib na La Salle-Dasmariñas sa Shakey’s V-League First Confe-rence sa The Arena sa San Juan City ngayon.

Iginupo ng  Lady Bull­dogs ang Ateneo La­dy Eagles, 25-12, 25-17, 26-24, noong Linggo upang manatiling tanging walang talong koponan na nangunguna sa Group II sa kanilang 2.0 slate sa torneong ito na suportado ng Shakey’s na may kaka­ibang format.

Sinabi ni  NU coach Ed­jet Mabayad na wala si­yang planong magpabaya  sa pakikipagharap sa La Salle-Dasmariñas la­labanan nila sa alas-4 ng ha­pon.

“Hindi kami titigil sa pagtratrabaho at ipagpapatuloy namin ang aming magandang laro. Hindi kami puwedeng magpabaya at mag-relax,” ani Mabayad.

Nakatuon naman ang la­hat ng mata kay NU team captain Dindin Santiago na muling sasanda­lan ng Jhocson-based school sa hangaring makapasok sa se­mifinal round sapul noong 2011 First Confe­rence matapos mabigo sa Ate­neo sa tatlong laro.

Tangka namang bigyang buhay ng Perpetual Help ang kanilang humi­hinang tsansa sa Final Four sa pakikipagharap sa San Sebastian sa isa pang laban sa alas-2 ng ha­pon.

Desidido ang Lady Altas, may 0-1 (win-loss) record, na i-sweep ang ka­nilang huling dalawang la­ro para magkaroon ng tsansa sa playoff para sa semis slot.          

Sa kabilang dako, wa­la nang ipinaglalaban pa kundi pride ang Lady Stags matapos mapatalsik sa kontensiyon sa pakiki­pagharap sa Adamson Lady Falcons, 21-25, 20-25, 25-23, 23-25 noong nakaraang linggo.