MANILA, Philippines - Pilit na lalayo ang Blackwater Sports sa mga koponang nag-aasinta sa mahalagang ikalawang puwesto sa pag-asam ng panalo laban sa NLEX sa PBA D-League Aspirants’ Cup ngayon sa Yñares Sports Arena sa Pasig City.
Sa ganap na alas-2 ng hapon magsisimula ang laban at ikalimang dikit na panalo ang pakay ng tropa ni coach Leo Isaac para patatagin ang kapit sa No. 2 spot na siyang makakasama ng mangungunang koponan sa semifinals matapos ang elimination round.
May kumpiyansa ang Elite sa Road Warriors matapos ipakita ng Café France na puwedeng talunin ang 3-time defending champion na nangyari noong Martes, 66-52.
“Naipakita nila na hindi imposibleng matalo sila. Kailangan lamang na patuloy ang magandang teamwork para mas gumanda ang tsansang manalo,” wika ni Isaac.
Tiyak naman na mas mabangis ang tropa ni coach Boyet Fernandez para pigilan ang posibleng paglasap ng kauna-unahang two-game losing skid sa liga.
Pinaigting na depensa ang nais na makita ni Fernandez, ngunit makakatulong kung manunumbalik din ang sigla sa opensa na hindi nakita laban sa Bakers matapos ang 28.2% shooting (22-of-78).
Bago ito ay magpapang-abot muna ang mga Boracay Rum at Informatics sa alas-12 ng tanghali.