CEBU, Philippines – Ang hepe sa Cebu City Police Office (CCPO) mibutyag nga wala silay namonitor nga kalihukan sa mga inilang druglords sa nasud dinhi sa Central Visayas, bisan paman sa kinilong mga nasakmit nga mga shabu sa nanglabay nilang mga operasyon.
Ang maong mga inilang druglords mao silang Rolando “Kerwin” Espinosa ug ang wanted na karong Sugboanong negosyante nga si Peter Lim ug mga kaubanan.
Niadtong nakalabay nga adlaw, ang National Bureau of Investigation (NBI) Task Force Against Illegal Drugs mipasaka og kasong drug trafficking batok nilang Espinosa, giingong iyang suppliers nga silang Lim, ang kombiktadong Chinese drug lord nga si Peter Co, fashion boutique owner Lovely Impal ug Reynaldo “Jumbo” Diaz, ig-agaw sa gipatay sab nga Cebu drug lord nga si Jeffrey “Jaguar” Diaz. Si Lim, una nang nakigkita kang Pres. Duterte niadtong tuig 2016 ug mihimakak sa mga pasangil nga nalambigit kini sa illegal drug trade. Samtang silang Kerwin ug Co naa na karon sa kostudiya sa kapolisan.
Ebidensiya
“Based on the evidence gathered by the undersigned investigators, (the accused) conspired in trading and trafficking of shabu in Cebu City using cell phones, electronic money transfers and bank deposits, among others, from 2008 to 2011,” sumala pa sa reklamo sa NBI. Gibase sa NBI ang gipasakang kaso sa gipanumpaang affidavit ni Espinosa ug Diaz kaniadto nga diin nagtumbok kang Lim ug Co isip tigsuplay nila og shabu.
Gikan nilang Lim ug Co ang shabu ni Diaz nga mao sab ang gisuplay kang Espinosa. Ang operasyon ni Espinosa naglakip sa Barangay Pasil, Ermita, Ponce, Villagonzalo, ug Lorega-San Miguel bisan pa og napriso pa kini sa Bagong Buhay Rehabilitation Center gikan tuig 2008 hangtud 2010 ug hangtud nga nakagawas siya tuig 2011. Apan si CCPO Director Police Colonel Engelbert Soriano miingon nga sa pagkakaron wala nila na-monitor kun naglihok pa gihapon dinhi sa Sugbo si Lim.
“Wala ako information actually whereabouts niya (Peter Lim) anung status niya. We’re just a city police, we are tasked to monitor their activities. So far, wala naman information kung nandito siya sa Cebu pero kasama siya sa monitoring naming,” matud pa ni Soriano Adunay mga impormasyon sa milabay’ng mga semana ang kapolisan nga adunay kalambigitan si Espinosa sa illegal drug trade karon sa Sugbo nga padayon nila karong gi-validate. “Sa mga previous arrest namin ginagamit ang kanyang pangalan niya (Espinosa), pero information lang naman wala kaming evidence,” dugang pa ni Soriano. /IBM (BANAT NEWS)