Bago pumirma ng kontrata ang overseas Filipino workers dapat na basahin muna ang mga karapatan at proteksiyon ayon sa batas kung magtatrabaho sa ibang bansa.
Sa malas may mga OFW na kahit pa malinaw ang rules sa kanilang kontrata ay hindi ito nasusunod. Lalo na sa mga skill workers at domestic helpers sa Saudi, Hong Kong, Singapore, China, Malaysia, at iba pang bansa.
Ang nakalulungkot, imbes na magsumbong ang mga pobreng OFW ay nagtitiis para lang may maipadalang pera sa pamilya sa ‘Pinas. Mula sa kontrata at batas patungkol sa food allowance, minimum na sahod, libreng ticket pabalik sa ‘Pinas, libreng medical treatment, overtime, holidays, food allowance, klase ng trabaho, bakasyon, day-off, at marami pang iba na hindi nasusunod pagkalapag sa ibang bansa.
Hindi makaangal ang OFW dahil mismong amo nila ang hindi sumusunod sa mga patakaran. Magsumbong man ang OFW sa kani-kanilang embassy, pero sa malas ay hindi rin natutulungan ang kanilang sitwasyon.