Ginagatasan ng GF
Dear Vanezza,
Ako si Paul, 24, bagger sa isang mall. Bago pa lang akong nagtatrabaho ng makilala ko si Lyn, kahera namin. Nagpakita siya ng motibo hanggang sa magkaroon kami ng relasyon. Pero nakahalata ako lagi niya akong inuutangan. Utang na wala ng bayaran. Kesyo may sakit ang tatay, nanay, o kapatid niya. Pareho lang maliit ang sahod namin. Nagsimula na akong tabangan sa kanya at nakipag-break ako. Umiyak siya at nagbantang magpapakamatay. Natakot ako at binawi ko ang sinabi ko sa kanya. Ano ang dapat kong gawin?
Dear Paul,
Tapatin mo siya kahit na gusto mo siyang tulungan, hindi puwedeng ikaw na lamang ang kanyang takbuhan. Pareho lang kayo ng sahod pero may pamilya ka rin. Kung mahal ka niya, uunawain ka niya. Kung hindi siya magbabago, malinaw na ginagawa ka niyang “gatasan”. Ipaliwanag mo rin na kung magpapakamatay siya ito ay kasalanan, paano ang kanyang pamilya na umaasa sa kanya. Maaring mahimasmasan siya kung mapagpaliwanagan mo nang husto. Nasa sa’yo pa rin ang desisyon.
Sumasaiyo,
Vanezza
- Latest
