Beauty tips mula sa saging

Ito ay huling bahagi ng paksa kung paano nakakatulong ang saging para mapanatili mo ang iyong kagandahan/kaguwapuhan. Narito pa ang ilan:

Nakakaalis ng namamagang mata – Nagtataglay ng mataas na lebel ng potassium ang saging, kaya naman nakakatulong ito na maalis ang pamamaga ng iyong mga mata sa mabilis na paraan. Maghiwa lang ng manipis na saging at saka ipatong ito sa iyong mga magang mata.

Nakakagaling ng problema sa balat – Napakahusay na gamot ng saging laban sa acne at tagihiyawat o pimple. Kuskusin lang ng maliit na hiwa ng saging ang mukha na may acne o pimple hanggang sa magkulay brown ang saging. Ibabad ng kaunting minuto ang katas ng saging sa mukha at saka banlawan. Gawin ito ng tatlong beses isang araw hanggang sa matuyot ang pimple.

Pampaganda ng buhok – Magandang pagkunan ng natural oil, carbohydrates, potassium at vitamins ang saging. Ang mga nutrients na ito ang kailangan upang magkaroon ka ng makinis at makintab na buhok at maiwasan ang split ends. Magdurog lang ng saging at patakan ito ng kaunting virgin coconut oil at iwan sa buhok ng 15-minuto. Makikita agad ang pagkakaroon ng malusog na buhok.